ភ្នំពេញ៖ ក្រុមហ៊ុន ជីហ្គៀ គ្រុបបានសហការជាមួយដៃគូអាជីវកម្មរៀបចំកម្មវិធីបរិច្ចាគឈាមប្រធានបទ «បរិច្ចាគឈាមជួយសង្គ្រោះជីវិត ផ្តល់ក្តីសង្ឃឹម និងលើកស្ទួយសុខុមាលភាពមនុស្សជាតិ» ចំនួន ១០០ប្លោកទៅកាន់មជ្ឈមណ្ឌលជាតិផ្តល់ឈាម ដើម្បីជំរុញដល់ការផ្គត់ផ្គង់ឈាមសំរាប់អ្នកជំងឺឱ្យបានគ្រប់គ្រាន់។

លោក ហ៊ ហាប់ នាយកប្រតិបត្តិផ្នែកអាជីវកម្មនៃក្រុមហ៊ុន ជីហ្គៀ គ្រុបមានប្រសាសន៍ថា បើទោះបីជាក្រុមហ៊ុនជីហ្គៀ គ្រុប ជាក្រុមហ៊ុនឯកជនក៏ពិតមែន ប៉ុន្តែក្រុមហ៊ុនតែងតែជំរុញលើកទឹកចិត្តបុគ្កលិកឱ្យចូលរួមផ្តល់ឈាមដោយស្ម័គ្រចិត្តព្រោះវាល្អទាំងសុខភាពរបស់ពួកគាត់ និងមានអត្ថប្រយោជន៍ចំពោះបងប្អូន មិត្តភិក្ត ក្រុមគ្រួសារ និងសហន៍របស់ពួកគាត់។ ម្យ៉ាងវិញទៀតសកម្មភាពនេះជាគំរូភាពមួយដែលបង្ហាញថាពួកគេអាចធ្វើធ្វើការសំរាប់សហគមន៍របស់ពួកគេ និងប្រជាជនរបស់ពួកគេផងដែរ។

លោកបន្តថា «ការសហការជាមួយមជ្ឈមណ្ឌលជាតិផ្តល់ឈាមនេះគឺយើងមានបំណងចង់ធ្វើជាគំរូក៏ដូចជាការណែនាំឱ្យបុគ្គលិករបស់យើងគ្រប់ជាន់ថ្នាក់យល់ដឹងអំពីការបរិច្ចាគឈាម និងមានទឹកចិត្តចែករំលែកក្តីស្រលាញ់ទៅកាន់អ្នកដ៏ទៃ ឬសហគមន៍របស់ខ្លួនតាមរយៈកម្មវិធីនេះ ខណៈដែលតម្រូវការឈាមនៅតែមាន ហើយវាចាំបាច់បំផុតសំរាប់អ្នកជំងឺ»។

លោកស្រី មុត រតនាមន្ត្រីផ្នែកផ្សព្វផ្សាយនៃមជ្ឈមណ្ឌលជាតិផ្តល់ឈាមមានប្រសាសន៍ថា «នេះជាសកម្មភាពមួយដែលល្អបំផុត ព្រោះបច្ចុប្បន្នមានអ្នកដែលមានតម្រូវការឈាមកាន់តែច្រើនដូចជាអ្នកដែលមានគ្រោះថ្នាក់ចរាចរណ៍ហើយត្រូវការឈាមបន្ទាន់ៗ ដូច្នេះយើងត្រូវបម្រុងឈាមសំរាប់ពួកគាត់»។

លោកស្រីបន្តថា ការបរិច្ចាគឈាមនៅមានកម្រិតនៅឡើយដូច្នេះលោកស្រីបានអំពាវនាវដល់ស្ថាប័នរដ្ឋ ឯកជន និងអង្គការសង្គមស៊ីវិលនានាបង្កើតកម្មវិធីបរិច្ចាគឈាមដោយស្ម័គ្រចិត្តនេះឡើងឱ្យបានច្រើនដើម្បីជួយសង្គ្រោះអ្នកដែលមានតម្រូវការឈាមចាំបាច់។

ទន្ទឹមនឹងគ្នានេះលោក ហ៊ ហាប់ បានលើកទឹកចិត្តឱ្យស្ថាប័ន ឬបុគ្គលនានាចូលរួមឱ្យបានច្រើនព្រោះថាការចូលរួមជាប្រចាំក្នុងការបរិច្ចាគឈាមមានន័យថាពួកគេកំពុងតែចូលរួមចំណែកជួយព្យាបាលប្រជាជនយើង ឬសំរាប់បំពេញតម្រូវការឈាមនៅតាមមន្ទីរពេទ្យនានា ដូច្នេះលោកគិតថាវាជាការចូលរួមនៅក្នុងសង្គមដ៏មានប្រសិទ្ធភាពបំផុត។

កម្មវិធីនេះបានសហការរៀបចំដោយក្រុមហ៊ុន ជីហ្គៀ គ្រុប សាលាអន្តរជាតិហ៊្វូតព្រីន ក្រុមហ៊ុនចែកចាយសម្ភារៈកុមារ Toys&Me និងក្រុមហ៊ុន Biz Solution ដែលប្រព្រឹត្តនៅថ្ងៃទី ១៦ ខែធ្នូ ឆ្នាំ២០២៣ នៅសាលាអន្តរជាតិហ៊្វូតព្រីនសាខាទួលគោគ។

ដៃគូសហការទាំង៤ នេះតែងតែរៀបចំកម្មវិធីបរិច្ចាគនេះយ៉ាងហោចណាស់ពីរដងក្នុងមួយឆ្នាំ និងបានបើកឱកាសដល់បុគ្គលិករបស់ខ្លួន ដៃគូអាជីវកម្ម និងសាធារណៈឱ្យចូលរួមសកម្មភាពនេះជាមួយផងដែរ៕